- ‘Circles’, 2013ko Sundance Jaialdian Epaimahaiaren Sari Berezia irabazi zuen filma, gerra hartako eszenatokira itzuliko da, soldadu hartaz senideek, lagunek eta salbatutako gizonak duten oroitzapena erakutsi eta egitada heroikoen baliagarritasunaz gogoeta egiteko
- Filmaren ondoren, Patricia Barcena, Cear Euskadiko zuzendaria, eta Redzija Subasic, Euskadin bizi den errefuxiatu bosniarra, jendeari irekitako solasaldi batean azalduko dira
- Filma 19:30etan eskainiko da AlhóndigaBilbaoko Golen Zinemetako 1 Aretoan. Sarrera librea izango da aforoa bete arte
Bilbon, 2014ko urriak 14.- Eusko Jaurlaritzako Biktimen eta Giza Eskubideen Zuzendaritzak aste honetan BilbaoAlhóndigako Golem zinemetako 1 Aretoan egiten ari den Zinexit erakusketak 2013ko Sundance Jaialdian Epaimahaiaren Sari Berezia irabazi zuen ‘Circles’ filma eskainiko du GAUR, urriak 14, 19:30etan. Filmak Balkanetako gerra ekarriko du gogora berriro ere, bere kideek hil zuten soldadu serbiar baten istoriotik abiatuta, egitada heroikoen balioaz gogoeta egiteko asmoz. Sarrera librea da aforoa bete arte.
‘Circles’ filmak, merkatuko kontrol batean zibil bosniar bat hilketa eragotzi zuen Srdjan Aleksic soldadu serbiarraren istorioa berreskuratuko du. Keinu hura bizitzaren prezioan ordaindu zuen, tropako kideek hil arte jipoitu baitzuten. Hamabost urte geroago, 2008an, Serbia, Alemania, Frantzia, Kroazia eta Esloveniaren arteko koprodukzio hau gerraren eszenatokira itzuli da, senideek, lagunek eta salbatutako gizonak Aleksic-ez duten oroitzapena islatu eta gertakari hark bizitzan utzi dien lorratzaz eta gerraosteaz eta bizikidetzaz duten pertzepzioaz gogoeta egiteko.
Srdan Golubovic filmaren egileak “Jugoslavia zaharreko gerra odoltsuetan izandako istorio positibo gutxietako bat” pantailaratu nahi izan du, ikusleei galdera hau luzatuz: “ba ote du zentrurik heroia izateak, ala Srdjan Aleksic-en keinua ezertarako balio ez duen sakrifizioa izan zen?”. Filmak irauten duen 112 minutuetan, soldadu serbiar hau ezagutu zutenen testigantza izango da publikoari “horrelako egitada heroiko eta errukitsu batek ekintza onak eragin eta pertsona hobeak bihurtzen ote gaituen” erakutsiko dutenak.
Filmaren ondoren, Patricia Barcena, Cear Euskadiko zuzendaria, eta Redzija Subasic, Euskadin bizi den errefuxiatu bosniarra, jendeari irekitako solasaldi batean azalduko dira.
Elkarbizitzaranzko 5. Zine Erakusketaren programazioak asteazkenean jarraitutuko du Amsterdameko IDFA jaialdiko Oxfam Saria eskuratu zuen ‘Light fly, fly high’ filmarekin, eta ostegunean amaituko da, Joxean Lasa eta Joxi Zabalaren desagerpenaren ikerketaz Donostia Zinemaldian estreinatu den ‘Lasa eta Zabala’ filmaren proiekzioaz.
Zinexiti buruz
Zinexit, Eusko Jaurlaritzako Lehendakaritzaren menpeko Bake eta Bizikidetzarako Idazkaritza Nagusiko Biktima eta Giza eskubideen aldeko Zuzendaritzak antolatutako Zinema erakusketaren 5. edizioa da. Lehendabiziko edizioa Bilbon ospatu zen 2010ean, Bizikidetza Demokratikoa eta indarkeriaren deslegitimizazio Planaren barruan (2010/2011). Ekimen honek, bakearen eta bizikidetzaren kultura sustatu nahi du, duintasunean eta oinarrizko giza eskubideen errespetuan oinarrituta, eztabaidarako eta ideiak aurrez-aurre jartzeko hiritarren espazio sozialak sustatu nahi ditu, elkarren arteko errespetua, oinarrizko printzipioak eta baloreak izanik.
Heziketarako erreminta sozializatzaile eraginkorra da zinema, ikuslea errealitate ezberdinak bizitzera eramaten duena, eta gizarteko injustizien aurrean, zentzu kritikoa sortarazten duena. Zentzu honetan, Zinexit ekimena, bakerako bidean, heziketa bat ematea du helburu, bizikidetza eta ezagutza moduan ulertuta, hausnarketa eta giza eskubideen sustapenerako baliagarri. Aurreko edizioetan bezala, erakustaldi hau giza-pedagogiaren proposamen bat da eta bere helburua, publikoak Giza Eskubideen eta Bizikidetza Demokratikoaren arloko zenbait edukiren inguruko eskaerak bideratu nahi ditu, eztabaida guneak sortu asmoz.