AURKEZPENA ZINEXIT 2024

Urriaren 8an, Zinexit Topaketaren baitan Tonio Hecker zuzendariaren “El caso Freytter” dokumentalaz gozatu ahal izan genuen. Jorge Adolfo Freytter Romero unibertsitateko irakaslearen bahiketa, tortura eta hilketari buruzko kontakizun bortitza, Kolonbiara itzulitako haren seme Jorge Freytterren eskutik.

Zinexiten 14. edizio honetan zenbait gai landu nahi dira, hala nola bidegabekeria eta diskriminazioa, erresilientzia eta ahalduntzea. Proiekzio bakoitza askotan gordean uzten diren errealitateetan sakontzeko aukera izango da, eta isilduak egon direnen ahotsak zabaltzeko aukera. Giza eskubideen aldeko borroka ahalegin kolektiboa eta etengabekoa da, eta ausardia, konpromisoa eta jarraikitasuna eskatzen ditu. Ekintza bakoitzak du garrantzia, eta ahots bakoitzak axola du. Borroka horretan bat eginda, denentzako mundu bidezkoago eta parekideago baten alde egiten dugu.

Gai hauen inguruan gogoeta egiteko, 5 film hautatu ditugu: Valentina Cicogna eta Mattia Colomboren “Pure unknown”, Elena Molinaren “Remember my name”; Luis Soto Muñozen “Sueños y pan”; Shiori Itoren “Black box diaries”; Robert Mulliganen “Matar a un ruiseñor”.

Era berean, orain arte bezala, “Bosa!” programarekiko lankidetza mantenduko dugu. Bilboko Udalaren laguntzaz, Zinexit Eskola egingo dugu Mohammed Kheyrandishen “Izurde Mutikoa” filmarekin. 6 eta 10 urte arteko 1.000 ikasle baino gehiago gerturatuko ditu zinemetara.

Azaroaren 25 eta 29 artean Azkuna Zentroko Golem zineman parte hartzera gonbidatzen zaituztegu, eta inguratzen eta kezkatzen gaituzten gaien inguruan gogoeta egitera, zinema erabilita hausnarketa eta pentsamendu kritikoa sustatzeko bitarteko gisa.