‘Sed de mal’ filmak itxiko du Zinexit
- Egungo nazioarteko zinema konprometituaren lau film luzeren ondoren, Orson Wellesen ‘Sed de mal’ klasikoarekin amaituko da Erakustaldia. Azkuna Zentroko Golem zinema-aretoetako 4. aretoan proiektatuko da, 19:00etan.
- Eusko Jaurlaritzako Justizia eta Giza Eskubideen Sailak sustatzen duen Giza Eskubideen XV. Zine Erakustaldia bihar amaituko da
ERAKUSTALDIAREN ETA FILMEN MATERIAL GRAFIKOA DESKARGATZEKO ESTEKA
Bilbon, 2025eko azaroaren 13an. Gaur, Ibon Cormenzana zinemagileak ‘Cuatro paredes’ bere azken filma aurkeztuko du. Guraso bakarreko familien bazterketa-arriskuari buruzko filma da, batez ere amek osatutakoena; eta bihar Hollywoodeko klasiko batekin amaituko da edizio hau, Orson Wellesen ‘Sed de mal’.
Azkuna Zentroko Golem Zinema-aretoek hartuko dute hilaren 14ra arte (ostirala) ikusgai izango den erakustaldia.
Edizio honetan, Zinexitek errealitate garaikideari buruzko begirada kritikoa eta gizatiarra proposatu du bost film luzeren bidez. Izen handiko zinemaldietan palmaresa duten nazioarteko hiru ekoizpen: Raha Amirfazli eta Alireza Ghasemiren In the Land of Brothers; Amber Faresen Coexistence, my ass!; Mstyslav Chernoven 2000 meters to Andriivka, erabateko estreinaldiak Bilbon; Ibon Cormenzana zinemagile bilbotarraren Cuatro Paredes azken film luzearen aurkezpena; eta Erakustaldiari amaiera emateko, Orson Wellesen Sed de mal proiektatuko da ostiralean, hilak 14.
Tradizioari jarraituz, Giza Eskubideen Zine Erakustaldia klasiko batekin amaituko da. Oraingo honetan, Godard eta Truffaut epaimahaikideak zirela, 1958ko Bruselako Erakusketa Unibertsalean filmik onena izendatu zuten Sed de mal filmaz gozatzeko aukera izango dugu.
Antzezle talde ikaragarria eta botereari eta ustelkeriari buruzko intriga kriminaleko istorio konplexua dituen Wellesen maisulana Carmen Muñoz zinemazale eta feministak aurkeztuko du. Nabarmentzekoa da haren hasierako sekuentzia plano ikusgarria, teknika eta eszenaratzea menderatzearen adibide ikaragarria, eta, zalantzarik gabe, zinemaren historiako hasierarik onenetakoa.
Mike Vargas (Charlton Heston), narkotikoen agentea, eta bere emaztea (Janet Leigh) Estatu Batuen eta Mexikoren arteko mugan dagoen Los Roblesera autoz doazen bi ezkonberri dira. Bertan, drogaren kapo bat hiltzen den leherketa baten lekuko dira. Vargas berehala hasten da ikertzen, eta lan hori, bere metodo ez oso ortodoxoengatik eta zalantzan jartzeko modukoengatik famatua den Hank Quinlan (Orson Welles) bertako polizia buruarekin partekatzen du. Elkarren arteko harremanak lehia sortzen du laster, batak besteari errua egozteko borroka latza eraginez.
Zinexiten 15. edizioa ixteko film bikaina, zalantzarik gabe.
SED DE MAL TRAILERRA (VOSE)
________
Informazio gehiago:
Aintzane Zorrilla Pérez ZINEXITEKO PRENTSA BULEGOA
Tel. 678 547 712
aintzane.zorrilla@gmail.com